Әлмәт районы хәрби комиссары урынбасары Владимир Зайцев ришвәт бирүдә арадашчы булуда (Россия Җинаять кодексының 291.1 маддәсе) шикләнеп тоткарланган. Бу хакта «БИЗНЕС Online» басмасы чыганакларына сылтама белән хәбәр итә.

Мәгълүматларга караганда, җинаятьне Татарстан буенча Федераль иминлек хезмәте идарәсе һәм икътисади куркынычсызлык һәм коррупциягә каршы көрәш идарәсе хезмәткәрләре ачыклаган.

Басма мәгълүматлары буенча, Зайцев контракт буенча хәрби хезмәт үтүче кешенең туганыннан 1,6 миллион сум акча алуда шикләнелә. Фаразлар буенча, әлеге акчага хәрбине хәрби хәрәкәтләр сызыгыннан ерактарак хезмәт итәргә урнаштырырга ярдәм итәргә вәгъдә иткәннәр.

Владимир Зайцевның әлеге эш буенча позициясе әлегә билгеле түгел.